काठमाडौं । द हिडन ट्रेजरको निम्तोमा मिस माल्टाको टोली सोमबार बिहान काठमाडौं आइपुगेको छ । मिस माल्टा चेरिस स्पिटेरीसहितको पाँच सदस्यीय टोली साता लामो भ्रमणका लागि आएको हो ।
टर्किस एयरलाइन्सको विमानबाट काठमाडौंको त्रिभुवन अन्तर्राष्ट्रिय विमानस्थलमा अवतरण गरेको टोलीलाई पर्यटन बोर्डका सदस्य र कर्मचारीले स्वागत गरे । उनीहरुलाई ढाकाटोपी र पञ्चैबाजाले स्वागत गरिएको थियो ।
यो टोली आगामी शनिबार आयोजना हुने मिस नेपालको ग्रान्ड फिनालेमा सहभागी हुनेछ । द हिडन ट्रेजरका निर्देशक प्रमोद कंसाकारले फिनालेको छेको पारेर नेपाल आउन संस्थाले निम्तो दिएको बताए ।
त्यसअघि मिस माल्टाको टोली काठमाडौं र चितवनका पर्यटकीय क्षेत्रको भ्रमण गर्ने कार्यक्रम छ । पछिल्लो समय युरोपको टापु मुलुक माल्टामा नेपाली कामदारको संख्या बढेसँगै भएको मिस माल्टाको यो भ्रमणले दुई मुलुकको द्विपक्षीय हितमा फाइदा पुग्ने अपेक्षा गरिएको छ ।
नेपाल भ्रमणमा आएका मिस माल्टा चेरिस स्पिटेरीसहितको टोलीलाई त्रिभुवन अन्तर्राष्ट्रिय विमानस्थल काठमाडौंमा स्वागत गरिंदै
मिस माल्टाको टोली साउन २२ मा स्वदेश फर्किने कार्यक्रम छ ।
तस्वीर : किरणराज बिष्ट / रासस
