रुकुम पश्चिमको चौरजहारीमा मोटरसाईकल दुर्घटनामा परेर एक युवाको मृत्यु भएको छ ।
रुकुम (पश्चिम) को चौरजहारी नगरपालिका –१ लामिछानेगाउँ निवासी ३२ वर्षीय चिरन्जिवी लामिछानेको आज बिहान दुर्घटनामा परेर मृत्यु भएको हो ।
जिल्ला प्रहरी कार्यालय रुकुम पश्चिम प्रहरी नायब उपरिक्षक प्रमेश बिष्टका अनुसार चौरजहारी बजारबाट घरतर्फ जाने क्रममा लामिछानेले चलाएको कर्णाली प्रदेश ०३–००१ प ०४७३ नम्वरको मोटरसाईकल अनियन्त्रित भएर दुर्घटना भएको हो । घर पुग्ने क्रममा आज बिहान १ बजे मोटरसाईकल दुर्घटना भएको र उपचारको लागि चौरजहारी अस्पताल लिएको बेला चिकित्सकले मृत घोषणा गरेका थिए ।
मृतक लामिछाने कर्णाली प्रदेश मार्शल आर्ट गेम्स महासंघ तदर्श समितिको सदस्यमा कार्यरत हुनुहुन्थ्यो । अत्यन्त मिलनसार, सहयोगी मनका चिरन्जिवीको मृत्युको खबरले पुरै गाउँ नै शोकमा डुबेको छ ।
मृतकको शव पोष्टमार्टमका लागि जिल्ला अस्पताल सल्ले ल्याईदै गरेको प्रहरीले जनाएको छ ।
